पाल्पा – मौसमको एक झट्काले पाल्पा जिल्लाभरि तहल्का मच्चाएको छ। बुधवार दिउँसोदेखि परेको भीषण हावाहुरी र वर्षाले दोस्रो तानसेन महोत्सव मात्र होइन, जिल्लाका अन्य ठाउँहरूमा समेत ठूलो क्षति पुर्याएको छ।
तानसेनमा जारी महोत्सव चैत २२ देखि वैशाख ३ गतेसम्म सञ्चालन गर्ने तय भएको थियो। तर बुधबार अपराह्नदेखिको असिना र हावाहुरीले महोत्सवस्थलमा बनाइएका स्टेज, स्टल, प्रवेशद्वार, घेरबार सबै ढालिदिएको छ। आयोजकहरूले चैत २८ मा कार्यक्रम पुनः सञ्चालन गर्ने तयारी गरे पनि बुधबार राति फेरि आएको भीषण हावाहुरी र वर्षाले त्यो पनि सम्भव हुन सकेन।
“महोत्सव स्थलमा लाखौंको क्षति भएको छ,” पाल्पा उद्योग वाणिज्य संघका अध्यक्ष विष्णु बहादुर कार्कीले बताए। “हामी अहिले क्षतिको यकिन विवरण संकलन गर्दैछौं। संरचना पुनः निर्माण गरेर मात्र महोत्सव अघि बढाउनेछौं।”
महोत्सवमा मात्रै होइन, हावाहुरी र वर्षाले पाल्पाका विभिन्न स्थानीय तहमा पनि गहिरो प्रभाव पारेको छ। बगनासकाली, पूर्वखोला, रिब्दिकोट, रैनादेवी छहरा लगायतका क्षेत्रमा क्षति पुगेको स्थानीयहरूले जानकारी दिएका छन्।
विशेषगरी पूर्वखोलाको जल्पा मैदानमा दुईवटा घर हावाहुरीले उडाएको स्थानीय बासिन्दाहरूले बताएका छन्। अन्य ठाउँहरूमा पनि यस्तै क्षति भएको खबरहरू आइरहेका छन्। तर सौभाग्यवश, हालसम्म मानवीय क्षति नभएको प्रहरीले जनाएको छ।
