पाल्पा — माथागढी गाउँपालिकाको आयोजनामा सुरु भएको माथागढी कप अन्तरपालिका फुटबल प्रतियोगिता सराई खेलमैदानमा धूमधामका साथ सुरू भएको छ। प्रतियोगिताको उद्घाटन लुम्बिनी प्रदेशका स्वास्थ्य मन्त्री खेम सारुले शुक्रबार गर्नुभयो। उद्घाटन कार्यक्रममा मन्त्री सारुले तल्लो तहबाटै खेलाडी उत्पादन गरी अन्तर्राष्ट्रिय स्तरसम्म पुग्ने उदाहरणहरू प्रस्तुत गर्दै यस्ता प्रतियोगिताले युवामा ऊर्जा थप्ने बताए।
माथागढी गाउँपालिका अध्यक्ष यम चिदीका अनुसार सराई मैदानलाई पाल्पाकै प्रमुख खेलमैदानको रूपमा विकास गर्ने दीर्घकालीन योजना छ।
प्रतियोगितामा पाल्पा जिल्लाभित्रका तानसेन नगरपालिका, रामपुर नगरपालिका, तिनाउ, माथागढी र बगनासकाली गाउँपालिकाले सहभागिता जनाएका छन्। आयोजक वडाध्यक्ष तथा खेल संयोजक तेज घर्तीमगरले युवा खेलाडीलाई अगाडि बढाउने उद्देश्यसहित प्रतियोगिता गरिएको बताए।
प्रतियोगिताको उद्घाटन खेलमा तिनाउ गाउँपालिकाले बगनासकाली गाउँपालिकामाथि प्रभावशाली जित दर्ता गर्यो। तिनाउका अस्मित शर्माले एक्लैले पाँच गोल गर्दै टोलीलाई ५–१ को जित दिलाए। उत्कृष्ट प्रदर्शनका लागि उनलाई म्यान अफ द म्याच घोषित गरियो।
प्रतियोगिता बैशाख ३१ गतेसम्म चल्नेछ। विजेता टोलीले नगद १ लाख रुपैयाँसहित शिल्ड, प्रमाणपत्र र मेडल पाउनेछ भने दोस्रो र तेस्रो स्थान प्राप्त गर्ने टोलीले क्रमशः ७५ हजार र ५० हजार नगद पुरस्कार जित्नेछन्।